أنا اللى قالوا عليه مخطوف
مع انى منيكم
و عايش طول عمرى وسطيكم
لا انا ظالم و لا هوال
و لا مشهور و لا مجهول
و لا مدفون فى بطن الارض
و لا مغرور فوق الحد
أنا المسلم أنا المصري
انا فى كل شعوب الأرض
كلمة حق
بصونها و أشيلها فوق راسي
و لا أخوان و لا سلفي و لا سيسي
و للباطل بكون السد
و قرأني في تأسيسي
انا دايماً بصون العرض
وعارف ربى
وبصلى سنتي والفرض
أنا اللى قالوا عليه مخطوف
مع انى منيكم
و عايش طول عمرى وسطيكم
انا نفسي
تكون نفسي رضيانة
بحلم بسيط
و قنعانة بانى حويط
اسلم نفسي للنور
اللى جاي م الحيط
من عند الامل بكرة
نهار مكشوف
بينهده قلبي و يطبطب
لاموت من الخوف
و سجاني في ملامحي
يقول الأااه
في جراحي
تبص عينه في عنيا
يلاقي الحق جوايا
رافع له شعار
في كام كلمة
أنا فدائي
أنا وطني
أنا مصري
أنا المسجون بطول عمري
أنا المخنوق
و بفضفض بأية صبر
و بصرخ وصوت كرباجك
بيعلم على ضهري
سنين القهر
و صدقني يا سجاني
أنا منك بقيت مكسوف
لأنك لسه مش عارف
أنا عندك
ليه مخطوف
يا سجاني
أنا مهما أموت
فــــ سجونك و فـــ قبورك
فأنا موجود
فى حلم الطفل اللي شايف ربيع بكرة
و رافع رايته منصورة
على حدود الأمل فكرة
تخلى الدمعة فى الصورة
تقول دايما ، أنا موجود
ياسجاني
أنا موجود
فى عَرق عمال فى حر الصيف
مسيرة شعب فى قلب السد
فى كلمة حق زى السيف
وتمحى الدمعة فوق الخد
تقول دايماً ، أنا موجود
ولا حد يقدر
يخطفني
لاني
مش بخاف مـــ الخوف
و منيش مخطوف
0 التعليقات :
إرسال تعليق