طير و مكسور الجناح ، بقلم / عبده جمعه

هي الصعوبة في الحكاية
في كلمتين
حب و فراق
من غير ميعاد
و اما حروف اليتم
رغم البعاد
تطرح ألم
على كام قلم
يكتب الحرف اللي راسم
سهم و قلبين ع الشجر
و ضحكة دايما تفتكر
حلمي اللي مكتوب ع الجبين
باقي و من دون البشر
و دمعة حايرة ع الخدود
تطرح عيون زي التتر
بتشوف ملامحي
فـــ غير ميعادها
زي المراية ع الحيطان
مخنوقة
و محبوس حلمها
بين الإطار
بتشوف قلوعي
فــ غير أوانها
فاردة على رموش القمر
شمس النهار
و هي لابسة توب العذاب
تحكي الهموم
تحكي سنين عني انا
و ازاي انا
خانق بصبري دمعتي
يمكن اشوف فيه الهنا
و فــ الشوارع و البيوت
والعمر و ايام السفر
هتشوف ملامحي ف كل صورة
ع البيبان
طير و مكسور الجناح
عايش فــ دنيا
من غير براح
محروم يطير للسما
محروم يغني غنوته
أخرس و فـــ لسانه العجب
تقدر تقول
فــــ وسط النار يقدر يعيش
لكن وحيد
من غير سبب
و ايه الجديد
اما بكون عايش سعيد
قدام عينك
و جوه مني ميت شهيد