انا فـــ حلمي
في زنزانة
بعرض القبر ،
و طول القبر
و عيني بتنزف على حيطانها
دموع الصبر
أنادي
و لا حد يسمعني
دموعي عليك تأنبني
و صدى صوتي
يقول المر
و مين فيكم
يا أهل الرؤى العارفين
يشوف حلمي و يفسر
أيامي و معانيها
قضباني و لياليها
حكاوي قلوبنا
و غناويها
وأنا في حلمي
كأني حزين
لأن الحزن جوايا
بقاله سنين
يقول آآآه
أقول أتنين
يرد العمر بالملايين
و أرد الهم في كتابة
حكاية حب
بتبكي عمرها المجروح
تسلم نبضها المدبوح
لأيامنا
و ترجع في الطريق واحد
بدال اتنين
و أنا فـــ حلمي
و أنا فــ حلمي و متحاصر
بشوف الهجر له ضافر
يخربش فوق جدار العمر
و يروي بين ظلام و نور
حكاية قلب كان فاكر
بانه حبيب
حكاية قلب كان بيتوضا
لقا و نصيب
و همسة كانت تطوف الأرض
تعود شايلة أمانينا
نحضن الاشواق و ننسى
كل خوفنا و همنا
لكن واهمين
بان الحب جَمعنا فــ طريق واحد
نعود تاني في أحلامنا
لطريق الهجر
تفارقنا
تناسينا
حياتنا و انتهت فينا
و طريق الحب
بقى طريقين
و انا فـــ حلمي
فـــ زنزانة
بعرض القبر و طول القبر
أداوي بدمعتي جرحك
و اجيلك و أخبط على ابوابك
و اباركلك
في يوم فرحك
يا الف ميت نهار مبروك
و يفضل دمي انا المسفوك
على اعتابك
و اقولهالك
يا حبيب الروح
فـــ بُعدك
بقيت انا المدبوح
و انا فـــ حلمي
بنام ليلي وانا المجروح
لكني مش هقولهالك
و بيكفي اعيش وحدي انا ف الهم
و اكون بعدك فــ زنزانة
بتقتل الف حلم و حلم
0 التعليقات :
إرسال تعليق