غنوة لبكرة ، بقلم / فوزي الجلبي

كفكفي دمع العينين

وحوطي ع الوجع

ف المدى المأزوم

جوه براح روحك

وعبي صبرك غنا

ف سكة المجاريح

بين ضلوع خوفك

ورشي عناب الفرح

فوق غصون الضي

ف الليل الموارب

سكة الخضار

عن مدى شوفك

لاجل الحلم المواتي

يتزوق بلون صوتك

خلي عنوتك لبكرة

ع الحلم متواعدة

لاجل الفرحة تندهك

وتمد الغنوة خطوتك

يا فاردة صوتك أمل

طالع لوش السما

اتعوذي وبسملي وصلي

ف لحظة تجلي

تاخدني وياكي لفوق

بين معارج ايديكي

كما عصفور سماوي

ف أول الطريق يا امه

حط بوسع حضنك

عطشان لريق نادي

من قلب مسكون رضا

تحت سقف الروح

كاتم جواه الزقزقة

وف غنوة وداع

فرد جناح الرحيل

بره دهشة عمري

وقفل صوتي بغيابي

اللي لازق بجتتي

وغناني ف موالك

غنوة فرايحية

ملضومة يا امه بايديكي

وطالعة لآخر سما